Нақши Ш. Шоҳтемур дар таърихи эҳёи давлатдории тоҷикон

              Хоруғ, 10.02.2014. (АМИТ «Ховар», Файз Мирасан).- Таҳти  унвони “Шириншоҳ Шоҳтемур ва таърихи эҳёи давлатдории тоҷикон”  нашриёти «Дониш»-и  Академияи илмҳои Ҷумҳурии Тоҷикистон рисолаи рӯзноманигор ва муҳаққиқи таърих, узви Иттиҳоди Нависандагони Тоҷикистон Қурбон Аламшоевро аз чоп баровард. Асар  ба забони русӣ буда, барои доираи васеи хонандагон пешбинӣ шудааст. Он дар ҳаҷми 17 ҷузъи чопӣ ва бо теъдоди 500 нусха нашр гардидааст. Китоб ба муносибати 115- солагии Қаҳрамони Тоҷикистон Шириншоҳ Шоҳтемур, ки соли 2014 ҷашн гирифта мешавад, таҳия ва мунташир гаштааст. 
       Асари мазкур рисолаи илмӣ буда, ба омӯзиши илмии ҳаёт ва фаъолияти ходими намоёни давлатӣ ва ҷамъиятиву сиёсии шӯравӣ Шириншоҳ Шоҳтемур  бахшида шудааст. Шириншоҳ Шоҳтемур аз зумраи он фарзандони диловари тоҷик аст, ки тамоми нерӯи ҷисмонӣ ва ақлонии худро ба бунёд ва таҳкими  давлати миллии тоҷикон бахшида буд. 
Шириншоҳ Шоҳтемур аз зумраи фарзандони содиқи ватан буд, ки ҳамеша барои ободию рушди бемайлони он фикр мекард. ҳарчанд дар тӯли фаъолияти хеш мавсуф дар вазифаҳои масъули ҳизбӣ ва давлатӣ кор мекард, вале ҳеҷ гоҳ аз таҳаввулоти иқтисодиву иҷтимоӣ ва фарҳангӣ фосила намегирифт. 
      Ин саввумин китоби журналист ва нависандаву муҳаққиқ Қурбон Аламшоев  дар бораи ин ходими намоёни сиёсӣ ва давлатии тоҷик Шириншоҳ Шоҳтемур аст. Барои китоби нахустин “Куҷое бошам, бо тоҷикон бошам” муаллиф  гирандаи Ҷоизаи ҷумҳуриявии рӯзноманигорон ба номи  Лоҳутӣ (с.2001) шуда буд. Пажӯҳиши дигари ӯ “Шоҳтемур- номуси миллат” низ дар байни дӯстдорони таърих ва фарҳанги тоҷик баҳои баланд гирифт.