Намаки аълосифати Тоҷикистон дар «Продэкспо-2014»

Душанбе, 12.02.2014. (АМИТ «Ховар», Лутфия Эшонқулова).- Дар Маскав намоишгоҳи байналмилалии маҳсулоти озуқаворӣ таҳти унвони «Продэкспо-2014» оғоз ёфта, дар ин чорабинии бонуфуз аз кишвари мо ҶСШК «Хоҷамӯъмин» иштирок намуд.Бояд зикр кард, ки намоишгоҳи байналмиллалии маҳсулоти озуқавории «Продэкспо-2014» яке аз чорабиниҳои бонуфузи соҳавии минтақа ба шумор рафта, сол то сол доираи иштирокдоронаш фарохтар мегардад. Дар ин намоиши маҳсулоти озуқаворӣ бештар аз 2300 корхона аз 63 давлати ҷаҳон намунаҳои маҳсулоти хешро ба маъраз гузоштанд. Чун як талаби чорабинӣ дар баробари сифати хуб, ҷиҳати экологии маҳсулот ба шумор меравад, дар намоиш беҳтарин намунаҳои намаки аълосифати ҶСШК «Хоҷамӯъмин» гузошта шуд. — Мо дар чунин намоишгоҳ бори нахуст ширкат меварзем. Барои муаррифӣ бештар аз 10 намунаи маҳсулоти хешро пешниҳод кардаем. Бо маҳсулоти аълосифат имрӯз бозори дохилиамонро пурра таъмин менамоем, мақсади ширкати мо дар намоишгоҳ шарикони хориҷӣ пайдо карда, ба берун содир кардан аст, — мегӯяд директори генералии ҶСШК «Хоҷамӯъмин» Маҳмуд Файзов.Намоишгоҳ то 14 феврал идома меёбад.Дар ин бора ба АМИТ «Ховар» котиби матбуоти Намояндагии Хадамоти муҳоҷирати Вазорати меҳнат, муҳоҷират ва шуғли аҳолии ҶТ Иброҳим Аҳмадов хабар дод.