Ободкориҳо дар Шаҳринав

Шаҳринав, 12.02.2014. (АМИТ «Ховар», Ҳотам Рабиев).-Ҳам ба фаъолият шуруъ кардани радиои маҳаллӣ дар мавҷи 101,9 FM ва ҳам насби 24 баландгӯяк дар маркази шаҳраку деҳот дар соли гузашта падидаи наве буд дар фазои иттилоотии диёр, -иброз дошт раиси ноҳияи Шаҳринав Исматулло Зайдов зимни нишасти хабарӣ.Тибқи иттилои раиси ноҳия бо дастгирии Сафорати Ҷопон дар Тоҷикистон бо маблағи 40 ҳазор доллари амрикоӣ бахши ҷарроҳии беморхонаи марказии ноҳия аз таъмири асосӣ бароварда, ба маблағи 63 ҳазор доллари амрикоӣ бо таҷҳизоти тиббӣ таъмин шуд. Ҳамзамон бо дастгирии мақомоти иҷроия шуъбаи амрози дарунӣ пурра аз таъмир бароварда, бо таҷҳизоти лозимӣ ҷиҳозонида шуд. Умуман, ба соҳаи тандурустӣ дар соли 2013 аз буҷети маҳаллӣ ба таври илова 955 ҳазор сомонӣ ва аз тарафи ташкилотҳои хориҷӣ зиёда аз 161 ҳазор сомонӣ маблағгузорӣ гардид. Дар ин соҳа дар айни ҳол 19 барномаи давлатӣ мавриди амал қарор дорад.