Омодагӣ ба ҷашни Артиши миллӣ дар Бадахшон

Хоруғ, 13.02.2014. (АМИТ «Ховар», Файз Мирасан).- Дар қисми низомии зудамали 01123, мустақар дар шаҳри Хоруғ бо мақсади боло бурдани руҳия ва иродаи  сарбозон ва истиқболи сазовор  аз Рӯзи Артиши миллӣ машқҳои низомию тактикӣ ва маҳфилҳои гуногуни маърифатию ватанпарастӣ баргузор мешаванд.
         Қумондони ин қисми низомӣ Изатулло Исматуллоев гуфт, ки: «Қисми низомии 01123 яке аз қисмҳои нахустини Вазорати дифоъ аст, ки дар қаламрави вилоят ба адои хизмат оғоз намуд. Бо гузашти айём ва бо дастгирии бевоситаи Вазорати дифоъ, ҷаҳду талошҳои мақомоти маҳаллии ҳокимияти давлатии шаҳри Хоруғ  шароити  хизмат беҳтар гардида, ҳомиёни Ватан дар мавриди омодагии низомӣ ба натиҷаҳои назаррас ноил гардиданд. Аз рӯи барномаҳои таълимӣ дарсҳои  назариявӣ гузаронида шуда, ба машқҳои тактикӣ низ аҳамияти лозимӣ равона мегардад». 
Ҳаёти сарбозиро бе гузаронидани машқҳои амалӣ тасаввур  кардан номумкин аст. Омӯхтани нозукиҳои  ҳаёти сарбозӣ барои адои хизмати минбаъда замина мегузорад.  Дар қисми низомӣ намояндагони шаҳру навоҳии мамлакат паҳлӯ ба паҳлӯ истода, барои тахкими  фазои тинҷу ором ва босуботи кишвар талош меварзанд.
      Ба гуфтаи Изатулло Исматуллоев дар рӯзҳои наздик мулоқоти сарбозон бо собиқадорони ҷангу меҳнат ва сарбозони интернатсионалист баргузор мегардад.