Парлумон санади байни Тоҷикистону Русияро тасдиқ намуд

Душанбе, 12.02.2014.(АМИТ «Ховар», Марзия Саидова).- 12 феврал вакилони палати поёнии Парлумони Тоҷикистон Протокол дар бораи ворид намудани тағйирот ба «Созишномаи байни Ҳукумати Ҷумҳурии Тоҷикистон ва Ҳукумати Федератсияи Русия дар бораи фаъолияти меҳнатӣ ва ҳифзи ҳуқуқҳои шаҳрвандони Ҷумҳурии Тоҷикистон дар Федератсияи Русия ва шаҳрвандони Федератсияи Русия  дар Ҷумҳурии Тоҷикистон»-ро тасдиқ карданд.
      Сумангул Тағоева -вазири меҳнат, муҳоҷират ва шуғли аҳолии ҷумҳурӣ санади мазкурро тавзеҳ дода гуфт, ки: «Созишномаи байни Ҳукумати Ҷумҳурии Тоҷикистон ва Ҳукумати Федератсияи Русия дар бораи фаъолияти меҳнатӣ ва ҳифзи ҳуқуқҳои шаҳрвандони Ҷумҳурии Тоҷикистон дар Федератсияи Русия ва шаҳрвандони Федератсияи Русия дар Ҷумҳурии Тоҷикистон» 16 октябри соли 2004 ба имзо расида буд, ки он аз 19 модда иборат аст.
Созишномаи мазкур 19 январи соли 2005, бо қарори Маҷлиси намояндагони Маҷлиси Олии Ҷумҳурии Тоҷикистон тасдиқ гардид.
Лоиҳаи Протокол дар бораи ворид намудани тағйиру иловаҳо ба Созишномаи мазкур  29 октябри соли 2013 дар шаҳри Москва ба имзо расид.
Зикр шуд, ки дар асоси ин Протокол ба банди 2-и моддаи 4-и «Созишномаи байни Ҳукумати Ҷумҳурии Тоҷикистон ва Ҳукумати Федератсияи Русия дар бораи фаъолияти меҳнатӣ ва ҳифзи ҳуқуқҳоии шаҳрвандони Ҷумҳурии Тоҷикистон дар Федератсияи Русия ва шаҳрвандони Федератсияи Русия дар Ҷумҳурии Тоҷикистон» аз 16 октябри соли 2004 тағйирот ворид гардида, рухсатнома барои кор ба корманд, ба муҳлати амали шартномаи меҳнатӣ на зиёда аз 3 сол дода мешавад.
        Санади мазкур гирифтани иҷозатномаи кориро ҳангоми фаъолияти корӣ дар қаламрави кишвари қабулкунанда ба муҳлати 3 сол бе гузаштани сарҳади кишвари қабулкунанда ба шаҳрвандони Ҷумҳурии Тоҷикистон имконият медиҳад.