Пешгирии муҳоҷирати ғайриқонунӣ

          Душанбе, 10.02.2014. (АМИТ «Ховар», Лайло Қосимова).- Моҳи январи соли 2014 Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон бо мақсади пешгирии муҳоҷирати назоратнашаванда ва ғайриқонунии шаҳрвандони хориҷӣ ба кишвар, муҳоҷирати меҳнатии наздисарҳадӣ ва истифодаи ин равандҳо аз ҷониби гурӯҳҳои муташаккили ҷинояткории трансмиллӣ, террористӣ, экстремистӣ (ифротгаро) ва  қочоқбарон, ки ба манфиатҳои миллии Тоҷикистон халал мерасонанд, корҳои муайянро ба анҷом расонид.
Дар ин муддат бо моддаи 499 қисми 1 Кодекси ҳуқуқвайронкунии маъмурии Ҷумҳурии Тоҷикистон 16 адад, бо моддаи 138 қисми 3 — 2 адад, бо моддаи 497 — 4 адад, бо моддаи 499 қисми 3 — 3 адад, дар маҷмӯъ 25 парвандаи ҳуқуқвайронкунии маъмурӣ оғоз гардид.
Аз шумораи умумии шаҳрвандони хориҷие, ки ба вайронкунии ҳуқуқи маъмурӣ роҳ додаанд, нисбат ба 9 нафар ҷазои маъмурӣ бо ситонидани  ҷарима ва берункунӣ аз қаламрави Ҷумҳурии Тоҷикистон ва нисбат ба 16 нафар ҷазо дар шакли ҷарима татбиқ гардид.
Тавре ки  аз Раёсати Хадамоти муҳоҷират  дар вилояти Суғд иттилоъ доданд, минбаъд низ корҳо дар самти пешгирии муҳоҷирати ғайриқонунии шаҳрвандони хориҷӣ идома хоҳанд ёфт.