Пуштибонии ИА аз риояи ҳуқуқҳои инсон дар ҶТ

Душанбе, 06.02.2014. (АМИТ «Ховар»).- Иттиҳоди  Аврупо  дар ҳошияи  барномаи «Василаи Аврупо  дар   бахши  демократия ва ҳуқуқҳои  инсон» ба  маблағгузории  5 лоиҳаи  нав   дар  Тоҷикистон  ба  маблағи  умумии  1  миллиону  397  ҳазору  837  евро  шурӯъ  кард. 
 
Тавре  ки  аз  намояндагии Иттиҳоди  Аврупо  дар  ҶТ  хабар  доданд,  мақсад  аз барномаи  мазкур мусоидат ба  рушду  таҳкими  демократия,  волоияти  қонун,  эҳтироми  ҳуқуқу   озодиҳои   асосии   инсон  дар   доираи  сиёсати  Иттиҳоди  Аврупо  дар   риштаи  ҳамкории  иқтисодӣ  ва  молиявию  техникӣ  бо  кишварҳои  сеюм   мебошад. Яке  аз  самтҳои   барнома   иборат  аз   рушди  ҷомеаи   шаҳрвандӣ ва қобилияти  он  барои   ҳифзи  самарабахши  ҳуқуқҳои  инсон  аст.
 
Иттиҳоди  Аврупо, ки  28  кишварро  фаро  мегирад, донори  калонтарини  ҷаҳон  ба  шумор  меравад. Тоҷикистон  дар  давраи  солҳои  2007 – 2010  баробари  66  миллион  евро  ва дар  давраи  солҳои  2011 – 2013  баробари  62  миллион  евро  кӯмаки   дуҷониба  гирифт,  ки  мақсад  аз  он  рушду   тақвият  бахшидани  соҳаҳои   ҳифзи  иҷтимоию тандурустӣ ва  бахши  инфиродӣ  мебошад.