Семинар оид ба имтиҳонсупории тестӣ

Данғара, 25.02.2014. (АМИТ «Ховар», Сулаймони Хол).- Бо мақсади ҷалби бештари шаҳрвандон ва дар сатҳи баланд гузаронидани корҳои фаҳмондадиҳӣ ва таблиғотию ташвиқотӣ Маркази миллии тестӣ дар чор минтақаи ҷумҳурӣ (шаҳрҳои Душанбе, Қӯрғонтеппа, Хуҷанд ва Хоруғ) семинари омӯзишӣ бо иштироки мудирони кабинетҳои методии шуъбаҳои маорифи шаҳру ноҳияҳои ҷумҳурӣ доир намуд. Дар айни замон дар ҳамаи мактабҳои таҳсилоти ҳамагонии ноҳияи Данғара чунин семинарҳо идома доранд ва ба хатмкунандагон роҳнамои довталаб дастрас шудааст. Маврид ба ёдоварист, ки семинарҳо бо хонандагон ва омӯзгорону волидайн дар ҳамаи шаҳру ноҳияҳои минтақаи Кӯлоб идома дорад ва довталабон имкон доранд дар наздиктарини нуктаи имтиҳонсупорӣ номнавис шуда, баъди муваффақона супоридани имтиҳон сазовори номи пуршарафи донишҷӯ гарданд.