Симпозиум дар мавриди рушди минтақаҳои Тоҷикистон
Душанбе, 28.02.2014. (АМИТ «Ховар», Марҳабои Азамат).- Мувофиқи маълумоти оморӣ то 1 январи соли 2014 дар соҳаи кишоварзии Тоҷикистон 89,7 ҳазор хоҷагиҳои деҳқонӣ таъсис ёфтааст, ки ин ба фароҳам овардани шароити мусоид барои рушди соҳибкорон кӯмак намуда, даромади хоҷагиҳои фермерӣ ва шумораи ҷойҳои корӣ дар ин бахшро афзун намуд. Муовини Вазири кишоварзии ҶТ С.Исроилов зимни суханрониаш дар Симпозиуми дурӯзаи «Рушди минтақаҳои Ҷумҳурии Тоҷикистон: вазъу дурнамо», ки 27 феврал дар Маркази тадқиқотии стратегии назди Ҳукумати Тоҷикистон оғоз ёфт, дар ин бора хабар дод.
С.Исроилов қайд намуд, ки соли 2013 ҳаҷми умумии маҳсулоти кишоварзӣ ба 16 миллиарду 757 миллион сомонӣ расид, ки назар ба ҳамин давраи соли гузашта баробари 7,6 фоиз зиёд аст. Соли 2013 истеҳсоли ғалла баробари 160 ҳазор тонна, картошка 125 ҳазор тонна, сабзавот 148 ҳазор тонна, зироатҳои полезӣ 30 ҳазор тонна, мева 15 ҳазор тонна ва ангур баробари 8 ҳазор тонна афзуд.
«Соли 2013 дар кишвар афзоиши маҳсулоти чорводорӣ аз қабили гӯшт 11 ҳазор тонна, шир 50 ҳазор тонна, пашм 189 тонна, асал 227 тонна, моҳӣ 610 тонна ва тухм 52 миллион донаро ташкил дод». — гуфт муовини вазир.
С.Исроилов ҳамчунин қайд намуд, ки саршумори чорвои калон баробари 49 ҳазору 850 сар, чорвои хурд 174 ҳазору 340 сар, асп 547 сар, парранда 140 ҳазору 27 сар ва оилаҳои занбури асал баробари 5 ҳазору 329 адад афзудааст.
Хотирнишон месозем, ки дар симпозиум масоили рушд, мушкилот ва сармоягузории минтақаҳои Тоҷикистон баррасӣ мешаванд.
Дар кори симпозиум роҳбарият ва мутахассисони Маркази тадқиқоти стратегии ҶТ, роҳбарону намояндагони сохторҳои давлатӣ ва идораҳои ҳамаи минтақаҳои кишвар ширкати доранд. Симпозиум имрӯз, 28 феврал, корашро анҷом медиҳад.