Созу навои тоҷикӣ дар Васант Виҳар

Душанбе, 24.02.2014.(АМИТ «Ховар», Марзия Саидзода).-Дар доираи баргузории фестивали байналмилалии фарҳангии «Сураҷкунд Мела-2014», ки дар Ҳиндустон доир шуд, ҳунармандони тоҷик дар маркази фарҳангии Васант Виҳари Деҳлӣ барномаи ҷолиби мусиқиро пешкаши тамошобинон гардониданд. Дар ин чорабинии фарҳангӣ беш аз ҳазор нафар меҳмонон, хусусан роҳбарони вазорату идораҳои Ҳиндустон, намояндагони корпуси дипломатии муқими ин кишвар ва соҳибкорони кишвари иқомат, ки бо Тоҷикистон ҳамкориҳои зич доранд, ширкат намуданд. Ба тамошобинон бештар ҳунарнамоии овозхони шинохтаи тоҷик Зикриоллоҳи Ҳаким ва раққосони ансамбли «Лола» писанд омада, онҳоро бо кафкӯбиҳои бардавом хуш истиқбол намуданд.  Дар ҷараёни сафар ҳунармандони тоҷик аз шаҳрҳои қадимаи Ҳиндустон боздид намуда, ёдгориҳои таърихии ин кишвари афсонавиро тамошо карданд.14.49.