Тадбирҳои биотехникӣ дар боғи Ғалаба

Душанбе, 14.02.2014. (АМИТ «Ховар», Муқаддас  Темурзода).-Сард гаштани вазъи ҳавои кишвар на танҳо ба пояҳои иқтисодию иҷтимоӣ, балки барои ҳаёти олами паррандагон ва вуҳуш низ мушкилот пеш овард. Ҷиҳати бо маводи хӯрокии зимистона таъмин гаштани олами паррандагон аз тарафи Раёсати ҳифзи муҳити зисти шаҳру навоҳии кишвар корҳои биотехникӣ гузаронида мешаванд. Чунин тадбир аз тарафи Раёсати ҳифзи муҳити зисти шаҳри Душанбе дар минтақаи хоҷагии ҷангал ва боғи маданию истироҳатии «Ғалаба» бо иштироки мутахассисони раёсат доир шуд. Ҳифзи олами паррандагон ва вуҳуш аз муҳимтарин самтҳои афзалиятноки соҳаи муҳити зист ба ҳисоб рафта, дар ин самт ҳамасола бо мақсади ҳифзи паррандагон ва таъминоти онҳо бо маводи донагӣ тадбирҳои иловагӣ андешида мешаванд.
        Тибқи иттилои Саидаҳмади Акрампур, сардори бахши иттилоотии Раёсати ҳифзи муҳити зисти шаҳри Душанбе дар ҳудуди Муассисаи давлатии «Хоҷагии ҷангал ва боғи фарҳангу истироҳатии «Ғалаба» чорабинӣ гузаронида шуда, дар минтақаҳои  интихобшуда барои таъмини паррандагон бо маводи донагӣ аз ҷониби раёсат 270 кг гандум, 275 кг ҷав ва зиёда аз 150 кг ҷуворимакка  пошида  шуд. 
         Гузаронидани корҳои биотехникӣ дар дигар шаҳру навоҳии кишвар идома меёбад.