Таваҷҷуҳи соҳибкорони турк ба Тоҷикистон

 
Анқара, 20.02.2014. (АМИТ «Ховар», Фарангис Раҳимова). ¬ — Сафири Ҷумҳурии Тоҷикистон дар Ҷумҳурии Туркия Фаррух Шарипов 16 феврали соли 2014  бо соҳибкорон ва саноатчиёни аъзои ассотсиатсияи “GESIAD” дар Анқара  вохӯрӣ анҷом дод.
Зимни мулоқот соҳибкорон ва сармоягузорон ба санадҳои қонунгузории Ҷумҳурии Тоҷикистон лоиҳаҳои сармоягузорӣ дар соҳаҳои гидроэнергетика, саноат, кишоварзӣ, коркарди меваю сабзавот, тартиб ва шароити кушодани корхонаи муштарак таваҷҷуҳи зиёд зоҳир намуда, қарор қабул карданд, ки моҳҳои наздик ҷиҳати шиносоӣ бо фазои сармоягузории Тоҷикистон ба Душанбе сафар намоянд. Дар ин бора ба мухбири махсуси АМИТ «Ховар» аз сафорати Тоҷикистон дар Туркия хабар доданд.  
“GESIAD” ассотсиатсияи саноатчиён ва соҳибкорони Гебзе соли 1993 таъсис ёфта, дар минтақаи саноатии Гебзе ҷойгир шудааст. Дар ин минтақаи саноатӣ 2000 корхонаи хурду калони истеҳсолӣ фаъолият менамояд ва дар он зиёда аз 15% маҳсулоти саноатии Туркия истеҳсол мегардад.