Вазири маориф рӯзҳои якшанберо дарсӣ эълон намуд

 
Душанбе, 13 феврал. (АМИТ «Ховар», Зарангези Латиф).- Бо қарори вазири маориф ва илми ҷумҳурӣ Нуриддин Саидов дар тамоми муассисаҳои таълимӣ, новобаста аз шакли ҳуқуқиашон рӯзҳои истироҳатӣ  низ дарсӣ  эълон гардид.
Ба иттилои Маҳмудхон Шоев, сухангӯи Вазорати маориф ва илми ҷумҳурӣ қарори мазкур дар ҳоле сурат гирифтааст, ки ҳафтаи аввали моҳи феврал дар пайи сард гаштани обу ҳавои кишвар дар тамоми муассисаҳои таълимӣ  бо қарори вазири маориф ва илми ҷумҳурӣ Нуриддин Саидов истироҳат эълон гардида буд
Бояд гуфт, ки тамоми раҳбарияти шуъбаҳои маорифи кишвар дастур гирифтаанд, ҷадвали дарсҳои иловагиро тартиб дода, дар рӯзҳои истироҳатии ҳафта низ ба донишомӯзон дарс гузашта, рӯзҳои истироҳатиро дар нимсолаи дуюм  ҷуброн намоянд. 
Ба гуфти Маҳмудхон Шоев, сухангӯи вазорат макотиби миёнае, ки имкони гузаштани дарсҳои иловагиро дар рӯзҳои дарсӣ доранд, метавонанд, охири ҳафта ба таври муқаррарӣ истироҳат кунанд.