Вусъати корҳои сохтмонӣ дар бозори Кӯлоб

Душанбе, 25.02.2014. (АМИТ «Ховар», Лутфия Эшонзода).-«То имрӯз 90 фоизи корҳои сохтмонӣ дар бозори шаҳри Кўлоб, ки дар он ҷо шаби 12 ба 13 январи соли равон  сўхтор ба амал омада, қисмати асосии бозорро  пурра нест кард, анҷом ёфтаанд», — иттилоъ доданд  ба АМИТ «Ховар» аз Раёсати Иттифоқи «Тоҷикматлубот».
Тибқи иттилои манбаъ, дар айни ҳол корҳои рангубор ва тозакунии  атрофи бозор мондаанд, ки рӯзҳои наздик ба итмом мерасанд.
Ёдовар мешавем, ки бозори шаҳри Кўлоб тобеи Иттифоқи «Тоҷикматлубот» буда, баъд аз сӯхтор раиси он Сироҷиддин Валиев қарор қабул намуд, ки бозори мазкур дар кўтоҳтарин муҳлат, то ҷашни Наврўз пурра ва дар шакли таҷдидгардидаи замонавӣ ба истифода дода мешавад.
Инак, Раёсати Иттифоқи Тоҷикматлубот тавонист бо сафарбар намудани ташкилоту муассисаҳои тобеи худ аз Суғду Хатлон ва ноҳияҳои тобеи марказ кори тақрибан солонаро дар  якуним моҳ анҷом диҳад.