Қубури нави газ ба Тоҷикистон чӣ медиҳад?

Душанбе, 13.03.2014. (АМИТ «Ховар», Кристина Эрлих).- Ҷамъияти саҳҳомии   кушодаи «Тоҷиктрансгаз» ва  ширкати  Корпоратсияи  миллии  нафту  гази  Чин созишномаро дар  бораи  таъсис додани   ширкати  муштарак   имзо  намуданд. «Ширкати  мазкур  дар  ҳошияи  лоиҳаи  бунёди  қубури гази Туркманистон- Афғонистон — Тоҷикистон — Чин  шохаи   чоруми  қубури  газро  идора  карда,  дар  он  чун кишвари транзитӣ  иштирок  мекунад. Масъалаи   ворид  намудани   гази  Туркманистон  барои қонеъ   гардонидани эҳтиёҷоти  Тоҷикистон   ҳанӯз  баррасӣ  намешавад», — гуфт  зимни  сӯҳбат бо   хабарнигори  АМИТ «Ховар» директори  генералии Ҷамъияти саҳҳомии   кушодаи «Тоҷиктрансгаз» Сайдаҳмад Шарофуддинов.
 
Мувофиқи  суханони  номбурда, қубури  нав гази  Туркманистонро  тавассути  қаламрави  Тоҷикистон  ба  Чин  интиқол  медиҳад. Ин  ба  Тоҷикистон   имкон  медиҳад, ки  на  фақат  сармояҳои бештареро ба  кишвар  ҷалб намояд, балки  ҷойҳори  нави  корӣ  низ  таъсис  диҳад, ки  ин  барои  иқтисодиёти  Тоҷикистон  басо  муҳим  аст. 
 
«Алҳол   Корпоратсияи  Чин лоиҳаи техникию  иқтисодиро  тарҳрезӣ   намуда, ҳамаи хусусиятҳои лоиҳа, аз  ҷумла  рӯзи  мавриди  истифода  қарор  додани  бахши тоҷикистонии   шохаи  қубури  газ то  моҳи августи соли  ҷорӣ  маълум  мегардад»,- гуфт  Сайдаҳмад  Шарофуддинов.
 
Қобили  зикр  аст,  ки  моҳи  сентябри  соли  2013 дар  ҷараёни  ҷамъомади  сарони  давлатҳои  аъзои  СҲШ байни Тоҷикистону  Чин  созишномаи байниҳукуматӣ  дар бораи бунёди қубури газ  аз  Туркманистон  ба  Чин  тавассути  қаламрави  Тоҷикистон  имзо  шуда буд. Он  вақт зикр  шуда буд, ки  татбиқи  лоиҳаи  мазкур  имконияти  барои  иқтисодиёти  Тоҷикистон  ҷалб  намудани  беш аз  3 миллиард  доллари  ИМА — ро чун  инвеститсияҳои мустақим  фароҳам  меорад. Мувофиқи  маълумоти  пешакӣ, масофаи  қубури  газ дар  қаламрави  Тоҷикистон  беш  аз  400  километрро  ташкил  дода, ҳар  сол  тавассути он  тақрибан  25 — 30  миллиард  метри  мукааб  газ  интиқол дода  мешавад.