Ҳафтаи фарҳангии Тоҷикистон дар ЭКО

Душанбе, 01.03.2014. (АМИТ «Ховар», Марзия Саидзода).- Бахшида ба ҷашни Наврӯзи байналмилалӣ, ки ҳамасола 21 март таҷлил мегардад, дар Муассисаи фарҳангии Созмони ҳамкории иқтисодӣ /ЭКО/, воқеъ дар Теҳрон аз 9 то 13 марти соли равон чорабинии фарҳангӣ созмон дода мешавад. Назар ба иттилои Шоҳмансури Шоҳмирзо -коршиноси фарҳанги тоҷик дар умури ЭКО дар ин чорабинӣ 20 асари хушнависии Ҳаким Ҳасан- хаттоти тоҷик, 40 акс аз Мижгони Сайёдӣ — аккoси эронӣ, инчунин либосҳои суннатии тоҷикӣ ба маърази намоиш гузошта мешаванд. Ҳадаф аз ташкили ин намоишгоҳ муаррифии фарҳангу тамаддуни бойи тоҷикон ва тавсеаи ҳамкориҳои фарҳангии Тоҷикистон бо кишварҳои узви ЭКО мебошад.