Ҳайати ШФ ФР ба Тоҷикистон меояд

Душанбе, 12.03.2014. (АМИТ «Ховар»).- Ҳайати  Шӯрои  Федератсия    бо  роҳбарии  раиси палата  Валентина  Матвиенко рӯзҳои  чоршанбею панҷшанбе  аз  Тоҷикистон  боздиди   расмӣ  менамояд. 
 
«Федератсияи  Русия  ва  Тоҷикистонро   муносибатҳои  деринаю  мустаҳками   иттиҳодӣ, ҳамкории  судманд дар бахшҳои  иқтисодӣ, иҷтимоӣ, гуманитарӣ ва  фарҳангӣ  муттаҳид  месозанд», — гуфт  Валентина  Матвиенко  дар  арафаи  сафараш ба Тоҷикистон.
 
Раиси  Шӯрои  Федератсия  рушди  ҳамкории  байни   минтақаҳои  Русия  ва Тоҷикистонро ба дараҷаи  баланд  арзёбӣ  намуда, хотирнишон  сохт, ки аз   ҷониби Русия беш  аз 50 ниҳоди  федератсия,  аз ҷумла   шаҳрҳои  Маскав,  Санкт — Петербург, Бошқирдистон, кишварҳои Краснодару Красноярск ба  ин  ҳамкорӣ саҳм мегузоранд.
 
Сафари ҳайати Шӯрои  Федератсия бояд  ба  рушди минбаъдаи мушорикати  стратегии  Русия ва  Тоҷикистон дар  ҳамаи бахшҳо  мусоидат  намояд, зикр  намуд  Валентина  Матвиенко.
 
Мавсуф дар бораи  муколамаи  байнипарлумонии Федератсияи  Русия  ва Тоҷикистон сухан  ронда,  сафарҳои  ҳайатҳо  ва  чорабиниҳои дигари муштаракро  хотирнишон  сохт. 
 
Ҳайати парлумони  Русия  дар  шаҳри  Душанбе ҳамчунин  дурнамои   таҳкими ҳамкории  гуманитарии Русия ва  Тоҷикистонро  мавриди  муҳокима қарор дода, аз Донишгоҳи  славянии Русия  ва  Тоҷикистон  боздид менамояд.
 
«Мо   тасмим  гирифтем, ки чанд  ҳазор   китобҳои  дарсӣ  ва  ашёҳои  методии ба забони русӣ  чопшударо  ба  мактабҳои  ҷумҳурӣ  тақдим  намоем. Мутаассифона, мактабҳои русии  Тоҷикистон   ҳанӯз  ҳам  ба   китобҳои дарсии  русӣ эҳтиёҷ  доранд. Бинобар  ин мо расонидани  мададро барои аз байн  бурдани ин  душворӣ вазифаи худ  мешуморем», — гуфт дар  хотима Валентина  Матвиенко.