Ҳамлаи нашъаҷаллоб ба кормандони милитсия

Душанбе, 12.03.2014. (АМИТ «Ховар», Мавҷуда Анварӣ).-  Зимни гузаронидани чораҳои фаврӣ-ҷустуҷӯӣ аз ҷониби кормандони Раёсати кофтукови ҷиноии Вазорати корҳои дохилӣ дар назди меҳмонхонаи «Сино», воқеъ дар кӯчаи Бухорои шаҳри Душанбе, ҳангоми дастгир намудан гумонбаршуда Нарзуллоев Оятулло Сайфуллоевич, соли таваллудаш 1986, сокини ноҳияи Рӯдакӣ, ба кормандони Раёсати кофтукови ҷиноӣ- подполковники милитсия Саидов Боймаҳмад Эшпӯлодович ва капитани милитсия Саидазимов Фаррух Худойбердиевич, ҳамла намуда, бо истифода аз корд ба узвҳои бадани онҳо ҷароҳатҳои халандаю буранда расонида, аз ҷойи ҳодиса ғайб задааст.
Бояд тазаккур дод, ки номбурда муддати дароз дар ҳудуди шаҳри Душанбе ба ғайриқонунӣ нигоҳ доштан, хариду фурӯш ва интиқоли маводи мухаддир дар ҳаҷми махсусан калон машғул буд. Ҳангоми дидани ҷойи ҳодиса 4 килою 682 грамм маводи сахттаъсири героин ва 3 килою 474 грамм маводи нашъадори навъи афюн дарёфт ва мусодира  шуд.
Дар ин бора сомонаи расмии ВКД ҶТ  иттилоъ додааст.