Ҷузъу томҳои ВКД таҳти назоратанд

Душанбе, 06.03.2014. (АМИТ «Ховар», Лайло Тоирӣ).- Вазири корҳои дохилии Ҷумҳурии Тоҷикистон генерал-лейтенанти милитсия Раҳимзода Рамазон Ҳамро рӯзи 10 марти соли равон аз корҳои ободонию кабудизоркунӣ ва  созандагию бунёдкорӣ дар Баталйони Хадамоти дидбонию пайраҳадорӣ дар назди Раёсати Вазорати корҳои дохила дар шаҳри Душанбе, Маркази таълимии Вазорати корҳои дохилӣ, Ротаи зарбазани ДТММ, Осорхона ва қисми низомии 5453-и Раёсати Қӯшунҳои дохилии Вазорати корҳои дохилӣ дидан кард ва барои бартараф намудани камбудиҳои ҷойдошта, дастуру супоришҳои мушаххас дод. 
Вазири корҳои дохилӣ ба қисми низомии 5453-и Раёсати Қӯшунҳои дохилии ВКД омада, аз корҳои ободонию кабудизоркунӣ ва ҷойи нигоҳдории захираҳои маводи хӯрокӣ дидан намуд. Дар ин радиф  вазири корҳои дохилӣ махсус таъкид дошт, ки чунин захираҳо бояд ба таври лозимӣ нигоҳ дошта шаванд ва ҳамеша ба талабот ҷавобгӯ бошанд.
Вазири корҳои дохилӣ ба масъулини дахлдор супориш дод, ки барои беҳтар намудани шароити корӣ дар ҷузъу томҳои мазкур ва ҷоннок намудани корҳои ободонию созандагӣ, таъмиру тармим ва кабудизоркунии минтақаҳои хизматӣ аҳамияти хосса зоҳир намоянд.