14 медали хонандагони тоҷик аз олимпиадаи Қазоқистон

Душанбе,3.03.2014. (АМИТ «Ховар», Зарангези Латиф).- Аз 27-уми феврал  то  3-юми марти соли ҷорӣ дар Ҷумҳурии Қазоқистон олимпиадаи  Жолдосбеков  аз фанни математика баргузор шуд.
Тавре ки Маҳмудхон Шоев, сухангӯи Вазорати маориф ва илми ҷумҳурӣ ба хабарнигори АМИТ «Ховар» иттилоъ дод, Тоҷикистонро дар ин озмун 14 нафар хонандагони синфҳои 9- 11 аз литсей-интернатҳои президентӣ барои кӯдакони лаёқатманди шаҳри Душанбе ва Чкалов, Гимназияи Тоҷикистон, Литсейи назди Донишгоҳи давлатии тиҷорати Тоҷикистон, Гимназияи ба номи Темур Собирови шаҳри Ваҳдат муаррифӣ намуданд.
Ба гуфти Маҳмудхон Шоев, хонандагони мо аз рӯи натиҷаи ҷамъбасти озмун 8 медали нуқра, 6 медали биринҷӣ ба даст оварданд.
Ёдрас мекунем, ки соли 2013 дар озмунҳои байналмилалӣ хонандагони ҷумҳурӣ 139 медал ба даст оварда буданд, ки аз он 24-тоаш медали тилло,  41-то  нуқра ва 74-тоаш медали биринҷӣ буд.