Баррасии таҷдидпазирии энергия

Душанбе, 17.03.2014. (АМИТ «Ховар», Мавҷуда Анварӣ). Дар ҷараёни боздиди расмии худ аз Ҷумҳурии Исломии Эрон вазири корҳои хориҷии Ҷумҳурии Тоҷикистон Сироҷидин Аслов 15 марти соли 2014 дар Теҳрон бо вазири неруи Ҷумҳурии Исломии Эрон Ҳамид Читчиён мулоқот анҷом дод.  Ҳангоми суҳбат ҷонибҳо масъалаҳои ҳамкории байни ду кишвар дар соҳаҳои энергетика ва зербинои нақлиёт, аз ҷумла амалисозии неругоҳи барқи обии «Сангтӯда-2» ва нақби Истиқлолро мавриди баррасӣ қарор доданд. Мусоҳибон инчунин дар мавриди баҳрабардории оқилона аз захираҳои обии минтақа ва манбаъҳои таҷдидпазири энергия мубодилаи афкор намуда, алоқамандии ду ҷонибро ба густариш ва таҳкими бештари ҳамкорӣ дар татбиқи тарҳҳои муҳими зербиноӣ таъкид карданд.