Баррасии вазъи экологӣ дар Хатлон

Хатлон, 28.03.2014.(АМИТ «Ховар», Меҳрубон Сатторӣ).-Воқеан экология зухуротест, ки аз хонаи истиқоматӣ сарчашма гирифта, то кӯчаву мавзеъҳо рафта мерасад. Яке аз масъалаҳои маҷлиси вакилони халқи вилояти Хатлон дирӯз-ин баррасии вазъи экологӣ дар қаламрави вилоят буд. Муовини аввали раиси вилояти Хатлон Қурбонбой Каримов вазъи экологии шаҳри Қӯрғонтеппа ва Кӯлобро ташвишовар арзёбӣ намуд. Зикр шуд, ки дар шаҳри Қӯрғонтеппа партовгоҳҳо ба талабот ҷавобгӯ набуда, лампаҳои симобдор дар дохили партовҳо хеле зиёд ба чашм мерасанд, ки ин ба фазои экологӣ зарари зиёд дорад. Пешниҳод шуд, ки тарбияи экологӣ дар муассисаҳои томактабӣ ҷоннок карда шавад. Инчунин дар иҷлосияи 17 даъвати чорум масъалаи андоз ва андозбандӣ мавриди муҳокимаи вакилони халқи вилояти Хатлон қарор гирифт. Сардори нозироти андози вилояти Хатлон Саидислом Амиров иброз дошт, ки дар қатори дигар корхонаҳо фаъолияти хоҷагиҳои деҳқонӣ низ мавриди санҷиш қарор гирифт. Санҷиш нишон дод, ки 2000 хоҷагии деҳқонӣ бе кайди нозироти андоз фаъолият менамояд.