Бозори фурӯши ниҳоли Хоруғ фаъол гашт
Хоруғ, 18.03.2014. (АМИТ «Ховар», Файз Мирасан).- Дар остонаи ҷашни Наврӯз дар бозори марказии шаҳри Хоруғ ярмаркаи маҳсулоти кишоварзӣ ва анвои гуногуни хӯрокӣ баргузор гардид.
Деҳқонон аз кулли навоҳии вилоят дастранҷи худро, аз қабили тухмии зироатҳо, ниҳолҳои ситрусӣ ва дарахтони мевадиҳандаю ороишӣ, гӯшту шир, ҷурғоту панир ва моҳӣ ба фурӯш гузоштанд.
Аммо аз ҳама бештар сокинони шаҳр ва атрофи он ба ниҳоли лимӯ, ки онро деҳқонони ноҳияи Дарвоз ба бозор бароварданд, таваҷҷуҳ зоҳир карданд, зеро дар гузашта олимон бар ин ақида буданд, ки дар шароити кӯҳистон парвариши лимӯ ғайриимкон мебошад. Вале таҷриба нишон дод ки дар шароити хона дар кӯҳистон ҳам мешавад ин навъи ниҳолро парвариш кард ва он хеле хуб нашъу намо меёбад.
Сардори раёсати кишоварзии вилоят Назрӣ Назриев гуфт, ки имсол ният доранд дар ҳудуди вилоят 67 ҳазор ниҳоли баҳрадор ва 30 ҳазор ниҳоли ороишӣ шинонанд. Деҳқонон аз вилояти Суғд ба сокинони шаҳри Хоруғ ду навъи моҳиро пешкаш карданд, ки дар зудтарин фурсат ба фурӯш рафт.
Чорвопарварони ноҳияи Мурғоб низ дар ярмаркаи мазкур маҳсулоти гӯштиро, ки дар шаҳри Хоруғ талабот ба он нисбат ба дигар маҳсулот рӯзҳои охир афзудааст, бо нархи то 26 сомонӣ ба фурӯш гузоштанд.