Бурёкӯбони кормандони ҳифзи ҳуқуқ
Хоруғ, 6.03.2014. (АМИТ «Ховар», Файз Мирасан).-Иддае аз кормандони мақомоти низомию амниятӣ ва ҳифзи ҳуқуқи ВМКБ сохиби хонаҳои барҳаво гардиданд. Ин бинои истиқоматии шаштабақа ва дорои 24 хона бо дастури Сарвари давлат дар маркази шаҳри Хоруғ бунёд гардид.
Моҳи ноябри соли 2012 бо маблағгузории дастгоҳи иҷроияи Президенти мамлакат сохтмони бино оғоз шуд ва он дар давоми ду сол мавриди баҳрабардорӣ қарор гирифт. Раиси шаҳри Хоруғ Фаромӯз Имомбердиев зимни маросими бурёкӯбон ҳамаи онҳоеро, ки хонаи нав гирифтанд, табрик намуда, ба онҳо хонаободӣ орзу намуд.
Сардори шуъбаи сохтмони асосии мақомоти маҳаллии ҳокимияти давлатии вилоят Шероз Абдуллоев гуфт, ки бо супориши Президенти кишвар соли равон дар ҳамин макон ба бунёди боз як бинои истиқоматии 50 ҳуҷрадор оғоз хоҳанд кард.