Истифодаи оқилонаи захираҳои табиӣ

Душанбе, 10.03.2014. (АМИТ «Ховар», Назир Назиров). – Чанде пеш дар Кумитаи ҳифзи муҳити зисти назди Ҳукумати Ҷумҳурии Тоҷикистон дар мавзўи «Зарурияти таҳияи  дастурамалҳо, роҳнамову тартибҳо  дар бахши ҳифзи муҳити зист ва истифодаи оқилонаи    захираҳои табиӣ» мизи мудаввар доир гардид.
Дар мизи мудаввар зикр шуд, ки: «Вобаста  ба пешрафту  тараққиёти соҳаҳои иқтисодиёт, воридоти техникаю технологияҳои нав ба ҷумҳурӣ, таъсироти фаъолияти гуногуни  хоҷагидорӣ ба муҳити зист, даровардани тағйироту иловаҳо  ба санадҳои меъёрии  ҳуқуқӣ, қонунҳо, риояи талаботи стандартҳои соҳавӣ ва  меъёрҳои байналмилалӣ дар соҳаи ҳифзи муҳити зист, имзо кардан ва шомил шудани Ҷумҳурии Тоҷикистон ба созишномаву конвентсияҳо, созмонҳои умумиҷаҳонӣ,  аз ҷумла Созмони ҷаҳонии   Савдо  кумита  тасмим гирифтааст, ки тибқи нақшаи фаъолияти худ  чорабиниҳо гузаронида, баҳри  иҷрои онҳо якҷоя бо  вазорату идораҳои дахлдор, донишгоҳҳо ва марказҳои илмию-тадқиқотӣ  ҳамкориро ривоҷ диҳад”. 
Кумита  қарор додааст, ки пеш  аз ҳама  ба масъалаи таҳияи дастурамалҳо, тартибҳо, роҳнамоҳо дар  бахши  ҳифзи  муҳити зист ва  истифодаи оқилонаи  захираҳои табиӣ диққати ҷиддӣ диҳад.