Изҳороти Қӯшунҳои сарҳадӣ: мубориза тақвият меёбад

Душанбе, 17.03.2014. (АМИТ «Ховар»).- Дар саҳифаҳои интернетӣ санаи 15.03.2014 хабар дар мавзӯи «Ду моҳигири афғон дар марз бо Тоҷикистон кушта шуданд» паҳн шуда буд. Сарраёсати Қӯшунҳои сарҳадӣ изҳор менамоянд, ки дар асл воқеа чунин аст: 12 марти соли равон дар минтақаи сарҳадии Кокули ноҳияи Ҳамадонӣ, хизматчиёни Сарраёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ҳангоми пешбурди вазифаи хизматӣ кӯшиши интиқоли маводи мухаддирро аз Афғонистон ба Тоҷикистон пешгирӣ намуданд, ки дар натиҷа байни сарҳадбонон ва қочоқбарон задухӯрди мусаллаҳона ба амал омад. Дар ҷараёни задухӯрд ду нафар аз қочоқбарон ба ҳалокат расида, 2 нафари дигарашон ба самти Афғонистон фирор намуданд. Мавриди зикр аст, ки маҳз дар ҳамин минтақа 21 феврали соли ҷорӣ як гурӯҳи қочоқбар аз марзи Афғонистон вориди Тоҷикистон гардида, ҳангоми бо сарҳадбонони тоҷик рӯ ба рӯ шудан, ҷониби онҳо аз яроқи оташфишон тир холӣ намуд, ки дар натиҷа як нафар сарбози мақомоти Қӯшунҳои сарҳадии Ҷумҳурии Тоҷикистон Маъруфов Сироҷиддин Абдусаломович, соли таваллудаш 1994, аз захми тир дар ҷои ҳодиса ба ҳалокат расид. Оид ба ин масъала дар ҳамкорӣ бо сарҳадбонони Пулиси сарҳадии Ҷумҳурии Исломии Афғонистон вохӯрии дуҷониба гузаронида шуда, ҷонибҳо масъалаи мазкурро муҳокима намуда, ба хулоса омаданд, ки ҳамкориро дар самти пешгирии қочоқи маводи мухаддир ва мубориза бо гӯруҳҳои ҷиноятпеша дар якҷоягӣ боз ҳам мустаҳкам намоянд. Дар ин бора аз Сарраёсати Қӯшунҳои сарҳадии КДАМ ҶТ хабар доданд.