Милитсия Рӯзи матбуотро табрик мегӯяд
Душанбе, 11. 03. 2014. (АМИТ «Ховар», Муқаддас Темурзода).- Вазири корҳои дохилӣ, генерал-лейтенанти милитсия Раҳимзода Рамазон Ҳамро имрӯз ҳамаи рӯзноманигорон ва намояндагони воситаҳои ахбори оммаро бо Рӯзи матбуот табрик намуда, ба онҳо дар оғози фасли баҳор сарсабзию сарбаландиро таманно кард.«Матбуоти тоҷик дар пешрафти ҳаёти сиёсӣ-иҷтимоӣ, илмӣ-фарҳангӣ ва маданӣ-варзишӣ нақши назаррас дошта, имрӯз ҳайати эҷодии он дар инъикоси дастовардҳои Истиқлолият, тараннуми арзишҳои олии давлату миллат, таҳкими суботу оромӣ, тарбияи наврасону ҷавонон дар рӯҳияи ватандӯстӣ ва некуаҳволии сокинони кишвар мавқеи хосса дорад»,-гуфт вазири ВКД. Ҳамчунин Раҳимзода Рамазон Ҳамро зикр намуд, ки маҳз дастгирӣ ва ғамхории Президенти Ҷумҳурии Тоҷикистон Эмомалӣ Раҳмон мебошад, ки имрӯз матбуоти тоҷик яке аз пешрафтатарин матбуот на танҳо дар Осиёи Марказӣ, балки дар Иттиҳоди Давлатҳои Мустақил ба ҳисоб рафта, бо озодандешӣ ва ошкорбаёнӣ дар рафъи камбудиҳои ҷомеа ва пешбурди ҳаёти сиёсӣ-иҷтимоӣ саҳми арзанда мегузорад.