Муҳокимаи маърӯзаи нави Бонки умумиҷаҳонӣ

Душанбе, 05.03.2014. (АМИТ «Ховар»).- 4 март дар  шаҳри Душанбе  натиҷаи  маърӯзаи  нави Бонки  умумиҷаҳонӣ  дар  мавзӯи  «Рушди диверсификатсионӣ: истифодаи беҳтари  захираҳои табиӣ дар  АвруОсиё» мавриди муҳокима  қарор  гирифт. 
 
Тавре  ки аз намояндагии  Бонки  умумиҷаҳонӣ  дар  ҶТ  хабар  доданд, тайи 20  соли охир захираҳои табий барои   рушди  минтақаи   АвруОсиё  мақоми   асосӣ  доштанд.  Дар  кишварҳои дорои захираҳои  ғании табиӣ  ва кишварҳое, ки  начандон  чунин  захира  доранд,  рушди босуръати  иқтисодиёт, хеле  коҳиш  ёфтани  сатҳи  камбизоатӣ  ва ба  таври  назаррас  беҳтар   гардидани  сатҳи зиндагӣ, аз  ҷумла дар  соҳаи маорифу тандурустӣ ба  қайд  гирифта  шуд. Кишварҳое, ки захираҳои зиёди  табиӣ   надоранд, бо  усули  вусъат бахшидани тиҷорат ва сарфи  маблағҳои ҳамгуфт аз захираҳои табии  кишварҳои  ҳамсоя  истифода намуданд.
 
«Тоҷикистон  чун  кишварҳои  дигари  АвруОсиё  дастовардҳои худро дар  масъалаи  истифодаи самарабахши  боигариҳои табиӣ  беҳтар  намуд.  Тоҷикистон  аз  соли  2006 барои истифодаи судманди сарватҳои  табиӣ  саъю кӯшишҳои зиёдеро ба харҷ  дод», — зикр  намуд роҳбари шуъбаи идораи  иқтисодиёт ва  коҳиш додани  камбизоатии Бонки  умумиҷаҳонӣ, яке аз  муаллифони маърӯза  Ивайло Изворски.