Муаррифии Тоҷикистон дар Олмон

 Душанбе, 6.03.2014 (АМИТ «Ховар»,Некрӯзи Муҳаммадсодиқ).-Дирӯз дар пойтахти Ҷумҳурии Федеролии Олмон — шаҳри Берлин чилуҳаштумин Намоишгоҳи байналмилалии туристии «ITB Berlin-2014” расман ба кор оғоз кард. Дар он намояндагони беш аз 188 кишвар иштирок доранд. Тавре ки Самариддин Асоев, сармуҳаррири рӯзномаи “Ҷавонони Тоҷикистон”, иштирокчии ин чорабинӣ аз Берлин хабар дод, ҷумҳурии моро дар ин ҳамоиши калонтарини туристии олам, ки то 10 марти соли ҷорӣ идома меёбад, масъулини соҳа ва намояндагони як силсила ширкатҳои сайёҳӣ бо роҳбарии Маликшо Неъматов, раиси Кумитаи ҷавонон, варзиш ва сайёҳии назди Ҳукумати ҷумҳурӣ муаррифӣ менамоянд.
Намоишгоҳи байналмилалии туристии «ITB Berlin” як навъ макони асосии ба фурӯш баровардани маҳсулоти туристии давлатҳои аъзои Созмони умумиҷаҳонии туристии назди Созмони Милали Муттаҳид ба ҳисоб рафта, намояндагони кишвари мо дар он соли ҳафтум аст, ки ширкат менамоянд. 
Дар доираи баргузории намоишгоҳ, мулоқоти вазирони туризми мамлакатҳои аъзои Созмони умумиҷаҳонии туристӣ баргузор гардида, Конгресси калонтарини сайёҳӣ дар ҷаҳон, ки аз соли 2004 якҷо бо “ITB Berlin” роҳандозӣ мешавад, барпо мегардад.