Наҷоти ҷони чанд нафар

Душанбе, 06.03.2014. (АМИТ «Ховар», Лайло Тоирӣ).- Шабонарӯзи гузашта кормандони Агентии назорати маводи нашъаовари назди Президенти ҶТ дар яке аз кӯчаҳои ноҳияи Фирдавсии пойтахт нуқтаи фурӯши маводи нашъаоварро барҳам доданд. Зимни гузаронидани чорабинии фаврию ҷустуҷӯӣ кормандони агентӣ ду сокини пойтахт — А.А.-и 40-сола ва Н.С.-и 35-соларо боздошт намуданд, ки ба паҳн намудани маводи нашъаовар машғул буданд. Нашъаҷаллобон дар манзили зисти худ афюн тайёр карда, дар ин маҳал онро мефурӯхтаанд.
Ҳангоми кофтукови шахсӣ аз онҳо ба миқдори калон афюн мусодира шуд. Тавре ки тафтиши пешакӣ нишон дод, боздоштшудагон худашон низ афюн истеъмол мекардаанд. Яке аз онҳо- Н.С. дар қайди беморхонаи наркологӣ қарор дошт. 
Тавре  ки аз хадамоти матбуоти агентӣ хабар доданд, дар айни ҳол аз тарафи шуъбаи тафтишоти агентӣ аз рӯи ин ҳодиса парвандаи ҷиноӣ оғоз гардида, тафтиш идома дорад. Миқдори маводи нашъаовари мусодирашуда дар айни замон муайян нашудааст. Ҳар ду боздоштгардида дар тавқифгоҳи нигоҳдории муваққатии агентӣ қарор доранд.