Назорати ҷиддии пардохти ҳаққи обу барқ

Душанбе, 13.03.2014. (АМИТ «Ховар», Зарангези Латиф).-Дирӯз дар мақомоти иҷроияи ҳокимияти давлатии вилояти Суғд ҷаласаи кории назди муовини раиси вилоят доир гардид, ки дар он намояндагони мақомоти иҷроияи ҳокимияти давлатии шаҳру навоҳӣ иштирок намуда, масъалаҳои иқтисодӣ ва иҷтимоиро баррасӣ намуданд.
Муовини раиси вилоят Анвар Ёқубов дар ҷаласа пардохти саривақтии музди меҳнати кормандони соҳаҳои хоҷагии халқи вилоят, пардохти ҳаққи барқ ва оби истифодашуда аз ҷониби аҳолӣ ва корхонаву ташкилотҳои гуногун ва дигар масъалаҳоро мавриди баррасӣ қарор дод.
Зикр шуд, ки дар айни замон як силсила  ташкилоту муассисаҳои қаламрави вилоят, аз ҷумла шабакаҳои барқиву обрасонӣ ҳанӯз музди меҳнатро дар моҳҳои охир пардохт накардаанд. Анвар Ёқубов ба шахсони масъул супориш дод, ки барои пардохти саривақтии музди меҳнати кормандони соҳаҳои хоҷагии халқ тадбирҳои зарурӣ андешида шаванд. Ҳамчунин гуфта шуд, ки шабакаҳои барқӣ ва обрасонии вилоят барои ҷамъоварии маблағи неруи барқ ва оби истифодашуда аҳамияти ҷиддӣ зоҳир намоянд.
Тавре ки аз хадамоти раиси вилоят иттилоъ додаанд, дар ҷаласа тасмим гирифта шуд, ки фаъолияти сохторҳои марбута зери назорати ҷиддӣ гирифта шавад ва маълумоти фаврии мақомоти маҳаллӣ ҳар ҳафта пешниҳод гардад.