Ошкор шудани қиморхона дар Кӯлоб

Душанбе, 12.03.2014. (АМИТ «Ховар», Лайло Тоирӣ).- Рӯзи 10 марти соли  2014 аз ҷониби кормандони шуъбаи Вазорати корҳои дохилӣ дар шаҳри Кӯлоб зимни гузаронидани чораҳои фаврӣ-ҷустуҷӯӣ шаҳрванд Абдулмаҷид Ҳотамов, сокини деҳаи Шакархони ҷамоати деҳоти Кӯлоб ҳамчун гумонбар дар ташкил ва нигоҳдории қиморхона дастгир шуд. Номбурда хонаи истиқоматиаш, воқеъ дар маҳаллаи С.Сафаровро ба қиморхона табдил дода, ба шаҳрвандон: Баҳодур Шарифов, Иброҳим Бобоев ва Саид Бозоров, сокинони шаҳри Кӯлоб барои қиморбозӣ шароит фароҳам оварда, аз онҳо ҳаққи хизмат ба маблағи  1 ҳазору 180 сомонӣ гирифтааст. 
Тавре ки аз хадамоти матбуоти вазорат хабар доданд, далелҳои шайъӣ гирифта шуда, аз рӯи ин ҳодиса парвандаи ҷиноӣ оғоз гардида, тафтиш идома дорад.