Озмуни наврӯзии байтбаракхонӣ

Хуҷанд,21.03.2014. (АМИТ «Ховар», Абдуаҳад Шарифзода).-Бахшида ба ҷашни Наврӯз дар маркази вилояти Суғд- шаҳри Хучанд чорабиниҳои идона доир гашта истодаанд. Дар Китобхонаи вилоятии оммавии ба номи Тошхӯҷа Асирии шаҳри Хуҷанд маҳфили наврӯзӣ баргузор гардид. Бояд гуфт, ки дар ин макони илму адаб бори нахуст дар баробари таҷлили ҷашни Наврӯзи оламафрӯз ва омода намудани анвою хони наврӯзӣ байни кормандони он озмуни «Байтбараки наврӯзӣ», «Кокулбофӣ» ва «Намоиши либос» баргузор гардид.Иштирокчиёни озмун, ҷамъи кормандон-ҷавондухтароне, ки аз ҳамаи шуъбаҳои китобхонаи мазкур буданд, дар чорабинии доиргашта фаъолона иштирок намуда, дар иҷрои шартҳо чолокӣ ва дониши хуб нишон доданд. Дар интиҳо ғолибони озмуни «Байтбараки наврӯзӣ», «Намоиши либос» ва «Кокулбофӣ» бо туҳфаҳои хотиравии роҳбарияти китобхонаи маскур мукофонида шуданд. Ёдрас бояд кард, ки чорабиниҳои асосии Наврӯзи Хуҷандшаҳр 22 март дар назди Театри давлатии мусиқӣ-мазхакавии ба номи Камоли Хуҷандӣ бо иштироки зиёда аз 20 ҳазор нафар сокини шаҳр дар назар гирифта шудаанд.