Пешгирӣ ва мусодираи беш аз 40 кило маводи мухаддир

Душанбе, 03.03.2014 (АМИТ «Ховар», Фарзонаи Давлат).- Кормандони милитсияи кишвар зимни гузаронидани якчанд чорабинии фаврӣ-ҷустуҷӯии дурӯзаи худ дар минтақаҳои ҷумҳурӣ пеши роҳи интиқол ва муомилоти ғайриқонунии маводи мухаддирро, ки 40 килою 983 граммро ташкил медиҳад, гирифтанд. 
Тавре ки дар ин бора сомонаи Вазорати корҳои дохилии кишвар хабар додааст,  зимни амалиёти мазкур аз ҷониби кормандони фаврӣ шаҳрванди Ҷумҳурии Исломии Афғонистон ва се шаҳрванди ҷумҳурӣ дар робита ба ҷиноятҳои мазкур ҳамчун гумонбар дастгир шуданд, ки аз онҳо маводи нашъадор дар ҳаҷми калон дарёфт ва мусодира шуд.
Гуфта мешавад, ки нисбат ба далелҳои мазкур парвандаи ҷиноӣ оғоз гардида, тафтиши пешакӣ идома дорад.