“Раҳнамо” -роҳнамои кӯдакон

Хуҷанд, 28.03.2014. (АМИТ «Ховар», Абдуаҳад Шарифзода).-Дирӯз дар маркази вилояти Суғд-шаҳри Хуҷанд боз як иншооти иҷтимоӣ расман ба фаъолият шурӯъ намуд. Шаҳрдори Хуҷанд Раҷаббой Аҳмадзода зимни боздид аз кӯдакистони нави “Раҳнамо” аз ҳуҷраҳои кӯдакистони мазкур дидан карда, аз шароите, ки барои тарбиятгирандагон фароҳам оварда шудааст, қаноатмандии худро изҳор намуд. Кӯдакистони мазкур бо маблағи 1млн. 048 ҳазор сомонӣ бунёд шуда, дар марҳилаи аввал 120 нафар тарбиятгирандаро қабул ва 20 нафарро бо ҷойи кори доимӣ таъмин хоҳад кард. Маъмурияти муассисаи нав нақша доранд, то интиҳои сол шумораи кӯдаконро ба 250 нафар ва ҳайати кормандонро ба 50 нафар расонанд. Ҳар як гурӯҳ аз 24 нафар кӯдаки аз 3 то 6- сола иборат буда, барои онҳо таълими забонҳои русию англисӣ ва омӯзиши компютерӣ ба роҳ монда хоҳад шуд. Инчунин дар раванди ифтитоҳи боғчаи навбунёд — хатнатуйии 6 нафар кӯдак аз оилаҳои ниёзманд баргузор гардид. Бояд ёдрас шуд, ки дар шаҳри Хуҷанд бо баробари фаъолият намудани боғчаи нав — «Раҳнамо», адади муассисаҳои томактабӣ алҳол ба 34 расида, дар онҳо зиёда аз 9 ҳазор кӯдак ба тарбия фаро гирифта шудааст.