Равобити ҳамкорӣ миёни ДДОТ ва ДДГМ

Душанбе, 28.03.2014. (АМИТ «Ховар», Раъно Нусратуллозода).-Дирӯз ректори Донишгоҳи давлатии омӯзгории Тоҷикистон (ДДОТ) ба номи С.Айнӣ Абдуҷаббор Раҳмонов бо намояндагони Донишгоҳи давлатии гуманитарии Маскав (ДДГМ) ба номи Шолохов Надежда Сентсова ва Елена Дириева мулоқот анҷом дод. Дар вохӯрӣ  деканони факултаҳои гуманитарӣ  ва мудирони кафедраҳои ҷамъиятӣ  иштирок намуданд. 
Тавре ки Бахтиёри Абдураҳим-котиби матбуоти Донишкадаи омӯзгорӣ иттилоъ дод, Абдуҷаббор Раҳмонов пиромуни тасвиби созишномаҳои байналмилалӣ  миёни Донишгоҳи омӯзгорӣ ва макотиби олии хориҷӣ гуфт, ки таълимгоҳи мо бо шумораи зиёди донишгоҳҳои бурунмарзӣ  равобити судманди ҳамкорӣ  дорад. Аксар донишҷӯёну магистрони мо дар Донишгоҳи омӯзгории шаҳри Томски Федератсияи Русия таҳсил менамоянд. Алъон дар мувофиқа бо Вазорати маориф ва илми мамлакат тасмим гирифтаем, ки муҳассилинро дар риштаи аспирантура низ ба хориҷи кишвар фиристем.
Ректор А.Раҳмонов афзуд, ки мо омодаем, то дар чанд ҷанба бо Донишгоҳи гуманитарии Маскав робитаи ҳамкорӣ ба роҳ монем. Хосса, дар самти табодули муҳассилин дар зинаҳои мухталифи таълим имконоти фаровон мавҷуданд. Итминони комил дорем, ки омӯзгорони пуртаҷрибаи Донишгоҳи гуманитарии Маскав дар заминаи барқароргардии ҳамкориҳои мутақобилан манфиатбор ба донишгоҳи мо омада, семинару конфронсҳо доир менамоянд. 
Надежда Сентсова гуфт, ки дар  Донишгоҳи гуманитарии Маскав 10 факулта фаъол буда, беҳтарин мутахассисон машғули тадрисанд. Факултае, ки нисбатан хоҳишманди бештар дорад, факултаи логапедагогика мебошад. Донишгоҳи мо имкон дорад, ки муҳассилинро аз таълимгоҳи шумо бо хобгоҳ таъмин намуда, ҳама шароитро барояшон  муҳайё созад. 
Дар идомаи мулоқот А.Раҳмонов деканони факултаҳои гуманитариро муваззаф намуд, ки ду ё се нафарӣ  донишҷӯ ва магистри хоҳишманди таҳсил дар Донишгоҳи гуманитарии Маскавро интихоб карда, ба раёсат пешниҳод намоянд.