Роҳҳои дарёфти бурсияву идрор

Душанбе, 7.03.2014 (АМИТ «Ховар», Раъно Нусратуллозода).- Дирӯз дар Донишгоҳи давлатии Хуҷанд ба номи академик Бобоҷон Ғафуров семинари навбатии шуъбаи робитаҳои байналмилалӣ баргузор гардид. Тавре ки аз Маркази иттилоот ва таҳлили раёсати донишгоҳ иттилоъ доданд дар семинари мазкур устодону донишҷӯён, магистрантону аспирантон ва кулли ҳаводорони барномаҳои таълимии байналмилалӣ ширкат варзидаанд.Мудири шуъбаи робитаҳои байналхалқии Раёсати донишгоҳ Темур Каримов оид ба барномаҳои байналмилалӣ, семинару конфронсҳо ва симпозиуму ҳамоишҳои илмӣ маълумот дод. Мавсуф махсусан қайд намуд, ки яке аз бурди асосии шуъбаи робитаҳои байналмиллалӣ дар соли 2013 ин ҳамроҳ шудани донишгоҳ ба Ассосиатсияи омӯзиши ҷомеаи форсизабонони дунё ва таъсиси маркази он дар вилояти Суғд бо ташаббуси кормандони шуъба мебошад. Алҳол донишгоҳ бо 8 лоиҳаҳои байналмилалии Иттиҳоди Аврупо бо ном TEMPUS — ERASMUS MUNDUS ҳамкорӣ дорад. Ӯ афзуд, ки соли равон аз тариқи ин барномаҳо муҳассилини донишгоҳ ба донишгоҳҳои бонуфузи кишварҳои Иттиҳоди Аврупо сафарҳои илмӣ кардаанд. Дар соли 2013 донишгоҳ бо 8 донишгоҳҳои ватаниву хориҷӣ шартномаҳо ба имзо расонид. Ва дар озмуни навбатии Комиссияи Иттиҳоди Аврупо ТЕМПУС-VI лоиҳаҳоеро пешниҳод карда буд ва аз 7 лоиҳаи ҷумҳуриявӣ, ки аз тарафи ин ташкилот дастгирӣ ёфтааст, дар 3-тояш донишгоҳи мо ғолиб омад ва ба сифати ҳамкор фаъолият мебарад.