С.Аслов эътимодномаи шаш сафири хориҷиро қабул кард

Душанбе, 06.03.2014. (АМИТ «Ховар»).-  5 марти соли 2014 вазири корҳои хориҷии Ҷумҳурии Тоҷикистон Сироҷидин Аслов нусхаҳои эътимодномаҳои Сафири Фавқулода ва Мухтори Туркманистон дар Ҷумҳурии Тоҷикистон Ишанқулӣ Аманлиев ва Сафири Фавқулода ва Мухтори Гурҷистон дар Ҷумҳурии Тоҷикистон Константин Жгентиро қабул намуд.
 Баъд аз супоридани нусхаи эътимодномаҳо мулоқоти вазири корҳои хориҷӣ бо сафирони Туркманистон ва Гурҷистон баргузор гашт, ки дар он масъалаҳои ҳамкориҳои дуҷониба дар соҳаҳои нақлиёт, тиҷорату иқтисод ва гуманитарӣ муҳокима шуданд. Ҳамчунин табодули афкор оид ба ҳамкорӣ дар доираи созмонҳои байналмилалӣ ва минтақавӣ сурат гирифт.
Инчунин 5  марти соли 2014 вазири корҳои хориҷии Ҷумҳурии Тоҷикистон Сироҷидин Аслов сафирони Фавқулода ва Мухтори Ҷумҳурии Куба Карлос Энрик Валдеса, Ҷумҳурии Кипр Георгос Касулидис, Ҷумҳурии Словакия Павол Иван ва Ҷумҳурии Сербия Терзич Словенкоро ҷиҳати супоридани нусхаҳои эътимодномаҳо ба ҳузур пазируфт.
 Зимни суҳбатҳо вазири корҳои хориҷии Тоҷикистон сафиронро бинобар ба ин вазифа таъйин шуданашон табрик намуда, ба онҳо ҷиҳати амалигардонии фаъолияти касбӣ комёбиҳо таманно кард.
 Ҷонибҳо оид ба доираи васеи ҳамкориҳо дар сатҳи дуҷониба ва чаҳорчӯбаи ташкилотҳои байналмилалӣ табодули назар карданд. Кӯшиши ҷонибҳо ҷиҳати минбаъд низ инкишоф додани ҳамкориҳои мутақобилан судманд ва шарикӣ дар соҳаҳои мухталиф зикр  шуд