Саҳми Кумитаи дин дар баргузории тӯйи 74 нафар

Душанбе, 27.03.2014. (АМИТ “Ховар”).- 26-уми март  бо ташаббуси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон тӯйи хонадоршавии ду ҷуфти арӯсу домод ва хатнатӯйи 70 нафар кӯдакон аз оилаҳои ниёзманд баргузор гардид. 
Мувофиқи хабари сомонаи расмии кумитаи мазкур нахуст, раиси кумита Абдураҳим Холиқов соҳибҷашнонро ба муносибати ин санаи фаромушнопазири ҳаёташон таҳният гуфта, иқдоми баргузории тӯйи дастаҷамъонаи эшонро идомаи мантиқии дастгирӣ ва ғамхориҳои Президенти кишвар ба нисбат ба қишрҳои гуногуни ҷомеа хондааст. 
Ба иловаи манбаъ, аз ҷониби масъулин ба домоду арӯс ва кӯдакони соҳибҷашн туҳфаҳои Кумита супорида шуд.
Маврид ба зикр аст, ки ҳамасола дар арафаи таҷлил аз ҷашни байналмилалии Наврӯз Кумитаи оид ба корҳои дин, танзими анъана ва ҷашну маросимҳои миллӣ ҷиҳати баргузории тӯйи хонадоршавӣ ва хатнасури ашхоси ниёзманд саҳм мегузорад.