Санҷиши тайёрии ҷузъу томҳо дар Хатлон

Душанбе, 11.03.2014. (АМИТ «Ховар», Лайло Тоирӣ).- Дар асоси талаботи Қонуни Ҷумҳурии Тоҷикистон «Дар бораи уҳдадории умумии ҳарбӣ ва хизмати ҳарбӣ» ва нақшаи чорабиниҳои Ситоди генералии Қувваҳои Мусаллаҳ ҳафтаи гузашта дар машқгоҳҳои ҳарбии гарнизони Хатлон, аз ҷумла дар Сумбула, Мумирак ва Саргазон машғулиятҳои амалии саҳроӣ доир шуданд.
Ҷараёни баргузории чорабинӣ дар машқгоҳи Саргазони ноҳияи Данғара бо иштироки сокинони дар эҳтиёт қарордоштаи ноҳияҳои Балҷувон, Темурмалик ва шаҳри Норак дар сатҳи лозимӣ ва хуб ба роҳ монда шуда, иштироккунандагон дар машғулиятҳои тирпарронӣ, ки як самти фаъолияти ҷамъомад маҳсуб меёфт, аз худ маҳорату малакаи хуб нишон доданд.
Тавре ки аз хадамоти матбуоти Вазорати мудофиа хабар доданд, ба роҳ мондани машғулиятҳои амалии саҳроӣ ва ҷамъомадҳои сафарбарӣ дар шароити кӯҳии Тоҷикистон мусоид аст. Мақсади чорабинӣ аз  омӯзиши ҳамаҷонибаи мавзӯоти сафарбарӣ дар ҳолати хатарҳои эҳтимолӣ ва ба ин васила, боз ҳам такмил додани донишҳои низомиву сиёсии шаҳрвандони дар эҳтиёт қарордошта, ҳамкории қувваву воситаҳои мудофиаи ҳудудӣ якҷоя бо мақомоти қудратию низомии минтақа иборат буд.