Сатҳи нави муносибатҳои Тоҷикистону Фаластин

Душанбе, 06.03.2014. (АМИТ «Ховар», Кристина Эрлих).- 5  март   раиси Палатаи  савдо  ва  саноати  Тоҷикистон  Шариф  Саид  дар  шаҳри  Душанбе  бо   Сафири  Фаластин  дар  Тоҷикистон  Муҳаммад   Таршанхонӣ   сӯҳбат  намуд.
 
Тавре  ки аз  ПСС ҶТ ба АМИТ «Ховар» хабар  доданд,  ҷонибҳо дар  ҷараёни  сӯҳбат  вазъи  ҳамкории  мутақобилан  муфиди палатаҳои  савдо  ва  саноати  Тоҷикистону  Фаластинро  мавриди муҳокима  қарор  доданд. 
 
Раиси  ПСС ҶТ ба дипломат хабар  дод, ки  дар  ҷумҳурӣ  барои ҷалби   сармояҳои  хориҷӣ,  дастгирии   сохторҳои бозаргонӣ, ҳамчунин   рушду  густариши  системаҳои  тиҷоратӣ ва  молиявию  бонкӣ  шароити  мусоид  фароҳам  оварда  шудааст. «Имрӯз Тоҷикистон  ба бозори  ҷаҳонӣ  фаъолона  ворид  шуда,   ин  раванд сол  аз сол  вусъат  меёбад,-  гуфт  Шариф  Саид.
 
Муҳаммад Таршанхонӣ  дар  навбати  худ  иброз  дошт, ки Фаластин  ҷонибдори  рушду тақвияти муносибатҳо  бо  Палатаи  савдо  ва  саноати  Ҷумҳурии  Тоҷикистон мебошад.