Тағйирот ба фаъолияти ҳунармандӣ

 Душанбе, 27.03.2014. (АМИТ «Ховар», Мавҷуда Анварӣ). -Имрӯз дар  Вазорати рушди иқтисод ва савдои Чумҳурии Тоҷикистон оид ба тағйири қонунгузорӣ дар бахши ҳунармандӣ мизи мудаввар баргузор гардид. Мақсади мизи мудаввар муҳокимаи лоиҳаи Қонуни Чумҳурии Тоҷикистон «Дар бораи фаъолияти ҳунармандӣ» буд.
Дар ҷамъомад сардори намояндагӣ, сафири Иттиҳоди Аврупо Эдуард Ауэр, намояндагони мақомоти дахлдори кишвар, ташкилотҳои тиҷоратӣ ва ғайритиҷоратӣ, инчунин хабарнигорони васоити ахбори омма ширкат варзиданд.
Лоиҳаи қонуни мазкур муносибатҳоеро танзим менамояд, ки дар ҷараёни амалисозии фаъолияти ҳунармандии касбӣ бо мақсадҳои ҳифз ва рушди мероси фарҳангӣ, барқарорнамоӣ ва рушди шабакаҳои маҳалҳои аҳолинишин, зиёдшавии шуғли аҳолӣ ва ҳифзи ҳуқуқҳои истеъмолкунандагони маҳсулоти ҳунармандӣ пайдо мешаванд. 
Мақсади лоиҳаи қонун муқаррар намудани асосҳои ҳуқуқии ташкили фаъолияти ҳунармандӣ дар Чумҳурии Тоҷикистон , эҳё, ҳифз ва рушди мероси фарҳангии нодир, қадимӣ, пайвандҳо ва анъанаҳои таърихии санъати ҳунармандии устоҳои ҷумҳуриро ҳамчун қисми фарҳанги тамаддун ва маҳаки муҳими мероси миллӣ, қонеъ гардонидани талаботи аҳолӣ ба молҳо, корҳо, хизматрасониҳои таъйиноти истеъмолӣ дошта, фароҳам овардани заминаи мусоид барои рушди ҳунармандӣ, ҳамчун низоми мустақили истеҳсолот, рушди шабакаҳои истеҳсолотӣ дар сатҳи маҳалҳо, зиёдшавии шуғли аҳолӣ, омода намудани мутахассисони касбӣ дар соҳаи ҳунармандӣ, ҳимояи ҳуқуқҳои истеъмолкунандагон ва истеҳсолкунандагон, инчунин маҳсулоти онҳо мебошад. 
Ширкаткунандагони ҷамъомад ба хулосае омаданд, ки дар шароити кунунӣ ворид намудани тағйиру иловаҳо ба қонуни мазкур зарурӣ ва саривақтӣ мебошад. Бояд қонуни нав қонуни пештараро такмил диҳад. 
Дар охир иштирокдорон доир ба масъалаҳои баррасишуда табодули назар намуда, ҷиҳати такмили онҳо пешниҳодҳои судманд ироа намуданд.