Ташхиси хуби бемории сил дар ҷумҳурӣ

Душанбе, 13.03.2014. (АМИТ «Ховар», Лайло Тоирӣ).-  Дар шаҳри Душанбе бо ташаббус ва дастгирии лоиҳаи USAID «Тандурустии босифат» ҷаласаи корӣ бо иштироки мутахассисони соҳаи силшиносӣ доир гардид, ки дар он масоили гирифторӣ ба бемории сил, бахусус шакли ба доруҳо мутобиқгаштаи он дар шаҳри Душанбе ва ноҳияи Ваҳдат мавриди баҳсу андеша қарор гирифт. Зикр шуд, ки барои дарёфти беморону муроҷиати шаҳрвандон нақши ҷомеаи шаҳрвандӣ хеле калон аст. Таҷрибаҳо собит месозанд, ки муроҷиат ба табибон ва ба табобат ҷалб гардидани шахсони сироятёфта аз мафкураи мардум сахт вобастагӣ дорад. Дарёфти гирифторон ба бемории сил ва сифати табобат аз ташхиси дурусту саривақтӣ оғоз меёбад. Дар ин росто кори таҳлилгоҳҳо дар шаҳри Душанбе ва ноҳияи Ваҳдат аз самтҳои дигари баҳс дар ин ҷаласаи корӣ буда, таъкид гардид, ки имрӯз дар ҷумҳурӣ, махсусан пойтахти кишвар, тамоми шароити ташхисӣ фароҳам оварда шудааст. Бояд зикр кард, ки ташхису табобати гирифторони бемории сил ва доруҳои зиддисилӣ барои табобат ройгон аст.
Тавре ки аз хадамоти матбуоти Вазорати тандурустӣ ва ҳифзи иҷтимоии аҳолӣ хабар доданд, дар ҷамъомад аз ҷониби мутахассисони варзидаи соҳа барои боз ҳам беҳтар ба роҳ мондани сатҳу сифати кор дар ин самт пешниҳодҳои судманд ироа  шуданд.