Тоҷикистону Куба- дар арзҳои дӯстӣ

      Душанбе, 05.03.2014.(АМИТ «Ховар», Марзия Саидзода».- Тавсеаи равобити мутақобилан судманди Тоҷикистон бо Куба имрӯз дар ҷараёни мулоқоти Сайдулло Хайруллоев-раиси Ҷамъияти дӯстӣ ва равобити  фарҳангии Тоҷикистон бо кишварҳои хориҷӣ  ва Карлос Валдес де ла Консепсион -Сафири фавқулода ва мухтори  Ҷумҳурии Куба дар Тоҷикистон /қароргоҳаш шаҳри Остона/  дар Душанбе матраҳ гардид. 
        Сайдулло Хайруллоев  доир ба фаъолияти  Ҷамъияти дӯстӣ ва равобити фарҳангии Тоҷикистон бо кишварҳои хориҷӣ ибрози назар намуда, афзуд, ки дар дохили ҷамъият боз наздики 20 ҷамъияти дӯстӣ бо кишварҳои хориҷӣ фаъолият дорад, ки нақши онҳо дар таҳкими равобити дӯстӣ ва ҳамкориҳои судманди фарҳангӣ беназир аст. Мавсуф афзуд, ки ҷамъияти дӯстии «Тоҷикистон-Куба» яке аз чунин ҷамъиятҳост, ки даҳ сол муқаддам таъсис шудааст. Зикр шуд, ки дар оянда интизор меравад, ки дар маркази маъмурии вилояти Суғд -шаҳри Хуҷанд шуъбаи ҷамъияти дӯстии «Тоҷикистон-Куба» созмон дода шавад.  
         Карлос Валдес де ла Консепсион, сафири Куба гуфт, ки: «Мо ҷонибдори тавсеаи ҳарчи бештари равобити гуногунсоҳа бо Тоҷикистон ҳастем ва умед аст, ки дар оянда бо истифода аз имконоти мавҷуда равобити ҳасана байни ду кишвар рушд хоҳад ёфт».
         Дар мулоқот ҳамзамон раиси ҷамъияти дӯстии «Тоҷикистон-Куба» Ҷӯра Латифов, олими шинохтаи тоҷик Собит Неъматуллоев доир ба таҳкими ҳамкориҳо байни ду кишвар дар бахшҳои гуногун ибрози назар намуданд.