В. Матвиенко аз пойгоҳи низомии Русия боздид менамояд

 
        Душанбе, 12 март.(АМИТ «Ховар», Марзия Саидзода).- Нимаи дуюми 12 март Валентина Матвиенко-раиси Шӯрои Федератсияи Маҷлиси Федералии Федератсияи Русия бо сафари расмӣ ба  Душанбе меояд. Аз палатаи болоии Парлумони мамлакат ба АМИТ «Ховар» иттилоъ доданд, ки Валентина Матвиенко зимни сафар ба Тоҷикистон ҳамчун рамзи эҳтиром ба тамаддуни давлатдории тоҷикон дар пояи муҷассамаи Исмоили Сомонӣ гулчанбар мегузорад. 
          Интизор меравад, ки раиси Шӯрои Федератсияи Русия дар ҷараёни сафараш бо Президенти Ҷумҳурии Тоҷикистон Эмомалӣ Раҳмон, раиси Маҷлиси миллӣ Маҳмадсаид Убайдуллоев, раиси Маҷлиси намояндагон Шукурҷон Зуҳуров мулоқот намуда, масоили марбут ба таҳкими равобити Душанбеву Маскав ва соири масъалаҳои тавсеаи ҳамкориҳои парлумонӣ, иқтисодию тиҷоратӣ, илмию фарҳангии Тоҷикистону Русияро баррасӣ хоҳад кард. Ҳамзамон В. Матвиенко Маҷмааи фарҳангию фароғатии «Наврӯз» -ро дар Душанбе тамошо менамояд. 
         Раиси палатаи болоии Парлумони Русия ба  Донишгоҳи славянии Тоҷикистону Русия ташриф оварда, аз Маркази хазинаи «Русский мир»  боздид намуда, дар назди ҳайати устодону донишҷӯёни донишгоҳи мазкур сухан мегӯяд. 
     Ҳамзамон дар назар аст, ки раиси Шӯрои Федератсияи Русия аз пойгоҳи низомии 201-уми Федератсияи Русия дар Тоҷикистон боздид намуда, бо ҳайати афсарони пойгоҳи мазкур мулоқот намояд.