Вусъати корҳо дар шоҳроҳи Панҷакент-Айнӣ

 
Панҷакент, 5.03.2014. (АМИТ «Ховар», Гулбаҳори Худойбердӣ).-Корҳои сохтмонӣ дар асоси лоиҳаи таҷдиди роҳи мошингарди Панҷакент- Айнӣ бо суръат давом доранд. 
Фахриддин Мўъминов, масъули Муассисаи давлатии нигоҳдории роҳҳои мошингарди Панҷакент ба мухбири АМИТ «Ховар» гуфт, ки дар ин иншоот беш аз 120 адад техникаи сохтмонӣ ва 400 нафар коргар фаъолият дорад. Мувофиқи лоиҳа бунёду таҷдиди 32 пул дар ин шоҳроҳ дар назар аст.
«Феълан масофаи роҳи мошингард 113,6 километр ва бари он 15 метр мебошад. Ғайр аз ин, роҳҳои мошингарди маркази шаҳри Панҷакент ва боз 60 километр роҳи дорои аҳамияти маҳаллӣ низ таҷдид мешавад», — идома дод Ф. Мӯъминов.
Маврид ба ёдоварист, ки лоиҳаи мазкур аз ҳисоби Ҳукумати Тоҷикистон ва қарзҳои бебозгашти созмонҳои молиявии байналмилалӣ амалӣ мегардад.