Ёдоварӣ аз саҳми рӯзноманигорон

Душанбе, 11. 03.2014. (АМИТ “Ховар”).- Раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон Абдураҳим Холиқов аҳли қалам ва рӯноманигорони тоҷикро ба муносибати Рӯзи матбуоти тоҷик таҳният гуфта, барояшон комёбиҳои эҷодӣ ва саодатмандии ҳаётро таманно намудааст. Дар табрикномаи раиси кумита омадааст: “Имрӯз воситаҳои ахбори умум дар ташаккули раванди рушду тараққиёти ҷомеаи навини Тоҷикистон нақши созовор дошта, саҳми онҳо дар инъикоси дастовардҳои давлати тозаистиқлоли мо, гиромидошти фарҳангу анъанаҳои миллӣ, арҷгузорӣ ба суннатҳои аҷдодӣ, тарбияи насли наврас дар руҳияи ватандӯстиву хештаншиносӣ ва эҳтиром ба марзу буми бобоӣ хеле барҷаста аст”.Абдураҳим Холиқов дар охир ибрози итминон кардааст, ки рӯзноманигорони тоҷик минбаъд низ бо нашри матлабҳои хеш дар самти рушди ҷомеаи шаҳрвандӣ дар кишвар, татбиқи нақшаву ҳадафҳои Президенти Ҷумҳурии Тоҷикистон Эмомалӣ Раҳмон, ки ба рушди минбаъдаи мамлакат нигаронида шудааст, саҳми сазовори хешро хоҳанд гузошт.