Қадршиносӣ аз хизмати журналист
Хоруғ, 9.04.2014. (АМИТ «Ховар», Файз Мирасан).- Мақомоти маҳаллии ҳокимияти давлатии ВМКБ зодрӯзи яке аз рӯзноманигорони шинохтаи тоҷик Назардод Ҷонбобоевро, ки ба синни 80 қадам ниҳод, ба таври расмӣ таҷлил карданд.
Раиси вилоят Шодихон Ҷамшед дар маросими расмӣ аз хизматҳои шоистаи рӯзноманигори шинохтаи тоҷик Назардоди Ҷонбобо ёдовар шуда, афзуд, ки саҳми устод дар рушди матбуоти точик ва тарбияи рӯзноманигорони маҳаллӣ хеле арзишманд аст. Мавсуф фаъолияти рӯзноманигории худро аз рӯзномаи вилоятии «Бадахшони советӣ» оғоз намуда, баъдан солҳои тӯлонӣ ба сифати хабарнигори рӯзномаи «Коммунист Таджикистана» ифои вазифа кардааст. Аксарияти мақолахои публисистиаш баъди нашр дар ҳукумати вилоят мавриди баҳсу баррасӣ қарор мегирифтанд ва барои аз байн бурдани мушкилоти ёдшуда масъулин тадбирҳо меандешиданд.
Назардод Ҷонбобоев баъди ба нафақа баромадан ба гирдоварии маъхазҳои зиёди фолклориву бадеӣ машғул шуда, чандин асарҳояш роҷеъ ба сангҳои қиматбаҳо, растаниҳои шифобахш ва чашмаҳои дорои обҳои маъданӣ ба нашр расиданд.
Назардод Ҷонбобоев набераи таърихшиноси маъруфи тоҷик Баҳодур Исткандаров буда, дар деҳаи Сохчарви ноҳияи Шуғнон таваллуд шудааст ва ҳаёти беш аз 40-солаи худро ба соҳаи журналистика бахшидааст.