Қурби доллари ИМА паст шуд
Душанбе, 17.04.2014. (АМИТ «Ховар», Лайло Тоирӣ).- Дар охири ҳафтаи гузашта қурби доллари ИМА нисбат ба сомонӣ каме паст шуда, фуруши он аз 5,0350 то 5,0200 сомонӣ коҳиш ёфт.
Ба ин тамоил фурӯши иловагии асъор аз ҷониби Бонки миллии Тоҷикистон ва ташкилотҳои қарзӣ дар бозори нақдии асъор дар давоми ҳафтаи гузашта мусоидат намуд.
Баланд шудани қурби доллари ИМА дар ҳафтаи гузашта ба омилҳои мавсимӣ, ки анъанавӣ ба моҳҳои апрел ва май рост меояд, фаъол шудани амалиёти иқтисоди хориҷӣ ва тағйир ёфтани қурби асъорҳои минтақа, алалхусус рубли русӣ алоқаманд мебошад.
Тавре ки аз хадамоти матбуоти Бонки миллии Тоҷикистон иттилоъ доданд, 16 апрели соли равон қурби миёнаи доллари ИМА дар шаҳрҳои Душанбе ба 5,0100-5,0300 сомонӣ, Хуҷанд ба 5,0200-5,0300 сомонӣ ва Қурғонтеппа ба 5,0200-5,0300 сомонӣ баробар шуд.