12 апрел боришот шиддат мегирад

Душанбе, 08.04.2014. (АМИТ «Ховар», Мавҷуда Анварӣ). — Аз Муассисаи давлатии обуҳавошиносии кишвар ба АМИТ «Ховар» иттилоъ доданд, ки охири ҳафтаи равон дар кишвар ҳавои номуътадил, абрноку боронӣ дар назар аст. Тибқи иттилои обуҳавошиносон рӯзҳои 10-13-уми апрел дар кишвар боришоти шадид рух дода, аз ҷумла дар кӯҳҳо ва ноҳияҳои баландкӯҳ эҳтимол меравад борон ба барф мубаддал гардида, ҳарорат махсусан шабона поён фарояд.Обуҳавошиносон таъкид мекунанд, ки боришот махсусан рӯзи 12-уми апрел шиддат гирифта, дар бархе аз минтақаҳо фаромадани сел дар назар аст. Рӯзҳои 14-15-16 ҳавои бебориш дар назар дошта шуда, ҳаво гарму офтобӣ ва бебориш хоҳад шуд.